Azərbaycan, Bakı, 03 iyun / Trend , müxbir E.İsmayılov /
"SOCAR Azərbaycanda öz brendi altında fəaliyyət göstərəcək 26 yanacaqdoldurma məntəqəsinin (YDM) tikintisi barədə qərar verib", - çərşənbə günü SOCAR prezidenti Rövnəq Abdullayev deyib.
"Dövlət başçısının sərəncamına əsasən biz YDM-lər tikəcəyik və onların sayı 26 olacaq", - Abdullayev bildirib.
Tikinti işləri artıq bu il başlayacaq. Ancaq bu il tikiləcək YDM-lərin sayını Abdullayev dəqiqləşdirməyib.
Şirkət bu il SOCAR Petrolium birgə müəssisəsinin yaradılması üçün onun nizamnamə kapitalını təşkil edən 10 milyon manat sərmayə qoyub.
Birgə müəssisə artıq fəaliyyət göstərir, kredit resursları və öz dövriyyəsi hesabına mərhələli şəkildə YDM-in tikintisini həyata keçirəcək.
Mənbə YDM-in sayını qeyd etməyib. Hazırda SOCAR-ın Gürcüstanda YDM şəbəkəsi var. Onların sayının yaxın illərdə 60-a çatdırılması gözlənilir.
Azərbaycanda cəmi iki Neft Emalı Zavodu (NEZ) var. İki zavodun məcmu gücü ildə 20 milyon tondur. NEZ-lər öz vəsaitləri hesabına dəniz və qurudakı yataqlardan əldə etdiyi ildə 6-7 milyon ton nefti emal edən SOCAR-ın tərkibinə daxildir.
Məqalə müəllifi ilə əlaqə ünvanı: [email protected]