Azərbaycan, Bakı, 15 sentyabr / Trend , müxbir A.Bədəlova /
"Ağ axın" (White Stream) layihəsi Azərbaycandan təxminən 16 milyard kubmetr qaz alınmasına ümid edir, Britaniyanın White stream Pipeline Company şirkətinin direktoru Roberto Pirani deyib.
"Azərbaycan layihənin realizəsinin birinci fazası üçün kifayət qədər qaz həcminə malikdir və hesab edirik ki, ümumiyyətlə ölkə 16 milyard kubmetrə qədər qaz tədarük edə bilər", - Pirani çərşənbə axşamı Bakıda Trend -a deyib.
Layihə rəhbərinin sözlərinə görə, layihənin ilkin gücü ildə 8 milyard kubmetr təşkil edəcək. Sonra onun gücü 16 milyardadək artırılacaq.
Piraninin dediyi kimi, "ağ axın" boru kəməri ilə ilk qaz tədarükü 2016-cı ildə başlayacaq.
"Ağ axın" layihəsi sədrinin sözlərinə görə, realizə üçün tamamilə real şanslar var.
"İndi layihə üzərində işləyirik. Hazırda qaz tədarükçüləri ilə danışıqlar aparılır. Artıq Gürcüstanla qarşılıqlı anlaşma barədə memorandum imzalamışıq", - Pirani deyib.
"Ağ axın" layihəsinə əsasən, Azərbaycanın "Şahdəniz" yatağından qazın Gürcüstan ərazisindən keçməklə Qara dənizin dibi ilə Ukraynaya və Aİ ölkələrinə tədarük edilməsi planlaşdırılır. Layihəni hazırlayanların konsepsiyasına əsasən, boru kəməri Tbilisi yaxınlığında yerləşən və təxminən 100 km uzunluğunda olan, Gürcüstan ərazisindən Qara dənizinə yönələn Cənubi Qafqaz qaz kəmərinə birləşəcək. Oradan təxminən 650 km dənizin dibi ilə Krıma çatdırılmalı, sonra Feodosiyadan Ukraynanın tranzit sisteminə qoşulmalıdır. Alternativ plan boru kəmərinin Rumıniyaya qədər uzadılmasını nəzərdə tutur.
