Azərbaycan, Bakı, 18 fevral / Trend , müxbir K.Konırova/
Qazaxıstanın "Tengizşevroyl" birgə müəssisəsi "Bakı-Tbilisi-Ceyhan" boru kəməri vasitəsilə "Tengiz" yatağı neftinin nəqlini dayandırıb. Buna səbəb Azərbaycan tərəfinin birtərəfli olaraq tranzit tarifini qaldırmasıdır. Bu barədə "QazMunayQaz" şirkətinin törəmə müəssisəsi olan "QazMunayQaz" Hasilat Kəşfiyyatı" SC-nin icraçı direktoru Əsgər Balcanov cümə axşamı Astanada mətbuat konfransında deyib.
Onun sözlərinə görə, şirkət bu səbəbdən BTC-dən imtina edərək, nefti Gürcüstanın Qara dəniz Batumi limanı istiqamətində nəql etməyə başlayıb. Bu limana neft Azərbaycan ərazisi ilə dəmiryolla çatdırılır. Batumidəki neft terminalının sahıbı "QazMunayQaz"-dır.
2009-cu ildə "Tengiz" yatağından BTC ilə 1,9 milyon ton neft nəql edilib. 2008-ci ilin oktyabr-dekabr aylarında isə 285,1 min ton Qazaxıstan nefti nəql olunub.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
BTC Co-nun səhmdarları aşağıdakılardır: bp (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz); Total (5 faiz); Itochu (3,40 faiz); Inpex (2,50 faiz); ConocoPhillips (2,50 faiz) və Amerada Hess (2,36 faiz).
