Azərbaycan, Bakı, 9 mart / Trend , müxbir E.İsmayılov/
Azərbaycan hazırda Azərbaycan qazının alqı-satqısı üzrə ARDNŞ (Azərbaycan Respublikası Dövlət Neft Şirkəti) və Rusiyanın qaz inhisarçısı "Qazprom" arasındakı ortamüddətli müqavilə çərçivəsində Rusiyaya sutkada 3 milyon kubmetr qaz ixrac edir. Bu barədə cümə günü neft-qaz bazarındakı mənbə bildirib.
Fevralın 22-nə olan məlumata görə, bu göstərici 1,5 milyon kubmetr təşkil edib.
Azərbaycan qazının Rusiyaya tədarükü 2010-cu il yanvarın 1-dən başlayıb.
ARDNŞ prezidenti Rövnəq Abdullayevin daha əvvəllər dediyinə görə, ilkin olaraq nəzərdə tutulurdu ki, 2010-cu ildə Rusiyaya 500 milyon kubmetr qaz ixrac ediləcək, lakin danışıqlar nəticəsində tərəflər tədarük həcminin iki dəfə artırılmasına dair qərara gəliblər.
Həmçinin. "Qazprom" və ARDNŞ 2010-ci ildə Rusiyaya ixrac ediləcək qazın həcminə dair razılığa gəlib. Növbəti ildə bu göstərici təxminən iki milyard kubmetr təşkil edəcək.
Azərbaycan illik buraxılma qabiliyyəti 5 milyard kubmetrədək olan Mozdok-Qazıməhəmməd qaz kəməri vasitəsilə Rusiyaya qaz ixrac edir. 2007-ci ilədək bu qaz kəməri vasitəsilə Azərbaycan 4,5 milyard kubmetrədək qaz idxal edib. Lakin sonradan Azərbaycan Rusiya qazının idxalından imtina edib.
Azərbaycan qazının Rusiyaya alqı-satqısı üzrə ortamüddətli müqavilə oktyabrın 14-də Bakıda imzalanıb. Müqavilə ARDNŞ (Azərbaycan Respublikası Dövlət Neft Şirkəti) ilə "Qazprom" şirkəti arasında imzalanıb, 2010-2014-cü illəri əhatə edir. Müqaviləyə uyğun olaraq, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə tədarük həcminin həddi göstərilməyib. ARDNŞ tədarük edə biləcəyi həcm barədə yarım il əvvəldən qarşı tərəfi xəbərdar edəcək.
