Azərbaycan, Bakı, 12 aprel /Trend/
Ötən il (İranda yeni il martın 21-dən başlayır) İranın neft terminalları vasitəsilə 844 210 304 barel müxtəlif növdə xam neft ixrac olunub. Bu barədə İranın Neft terminallarının idarə olunması şirkətinin icraçı direktoru Məhəmmədrza Müvəhhidi bildirib. Məlumatı İranın IRNA informasiya agentliyi yayıb.
Müvəhhidinin sözlərinə görə, bu dövr ərzində şirkətin neft terminalları "swap" müqavilələri çərçivəsində Neka (İranın şimalı) limanında 32 740 524 barel müxtəlif növ neft əldə edib və bunun müqabilində Xark və Cask (İranın cənubu) limanlarında neft ötürüblər.
Müvəhhidinin sözlərinə görə, Neft terminallarının idarə olunması şirkəti Mahşəhr, Xark, Cənubi Pars və Neka neft terminalları vasitəsilə xam neftin ixracı və idxalı ilə məşğul olur.
Onun sözlərinə görə, ötən il Yaponiya, Çin, Cənubi Afrika, Braziliya, Pakistan, Hindistan, Niderland və Syerra-Leonaya 258 649 473 barel yüngül neft, 473 125 563 barel ağır neft, 112 435 268 barel bitum qumlu neft ixrac edilib.
Müvəhhidi bildirib ki, şirkət ölkədə istehsal olunan 8 milyon barel neftin ixracı və saxlanılması üçün porensiala malikdir.
Onun sözlərinə görə, şirkətin balansında olan neft terminalları 564 min tona yaxın neft daşıyan gəmiləri qəbul edə bilər.