Azərbaycan, Bakı, 27 aprel /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Xəzərin Azərbaycan sektorundakı "Neft Daşları" yatağında yerləşən "Neft Daşları - 2585" platforması üçün blokların hündürlüyünü azaldır. Bu barədə çərşənbə axşamı ARDNŞ-dəki mənbə bildirib.
Platformanın üç blokunun inşası Heydər Əliyev adına Bakı Dərin Özüllər Zavoduna, biri isə "Neftqaztikinti" trestinə tapşırılıb.
"Bir blok dənizə göndərilib və məlum olub ki, blok lazımi ölçüdən 5 metr artıqır, ona görə də zavod tərəfindən istehsal edilən qalan iki blokun hündürlüyü 5 metr azaldılıb", - mənbə deyib.
Onun sözlərinə görə, Dərin Özüllər Zavodunun iki bloku artıq tikilib, 3-cü blokun tikintisi isə davam etdirilir.
64 metr hündürlüyündə olan platforma suyun 46 metr dərinliyində, "Neft Daşları - 1887" beşbloklu platformasından 500 metr aralıda yerləşdiriləcək. Yeni platformada 12 quyunun qazılması planlaşdırılır.
Yeni platforma "Neft Daşları" yatağında sabit həcmi saxlamaq üçün lazımdır. "Neft Daşları" Azərbaycanıln karbohidrogen istehsalına başladığı ilk dəniz yatağıdır.
Bu tədbirlər Azərbaycan Prezidentinin "Neft Daşları" Neft-Qaz Çıxarma İdarəsindən hasilat həcminin 812 min tondan 1,2 milyon tonadək (1,5 dəfə) artırılmasına dair sərəncamı çərçivəsində həyata keçirilir.
ARDNŞ prezidenti Rövnəq Abdullayevin əvvəlcə dediyi kimi, Azərbaycanın "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq, "Neft Daşları" yatağının işlənməsi 2035-ci ildə başa çatmalıdır.
