Azərbaycan, Bakı, 26 iyul /Trend, müxbir E.İsmayılov/
Bu ilin sonunadək ARDNŞ (Azərbaycan Dövlət Neft Şirkəti) Xəzərin Azərbaycan sektorunda eyniaadlı dəniz yatağındakı "Günəşli-4" platformasında qaz-kompressor stansiyasının istismara verilməsini planlaşdırır. Bu barədə bazar ertəsi ARDNŞ-dəki mənbə məlumat verib. Yeni stansiyanın quraşdırılması yataqdan sutkada 400 min kubmetr həcmində atmosferə atılan aşağıtəzyiqli səmt qazının toplanmasını təmin etmək məqsədi daşıyır.
Onun sözlərinə görə, bu layihə çərçivəsində bütün tikinti işləri artıq başa çatıb və hazırda bir neçə ay davam edəcək işəsalma-sazlama işləri görülür.
"İndi işəsalma-sazlama işləri görülür. İlin sonunadək stansiya istismara veriləcək", - mənbə bildirib.
Bu layihə çərçivəsində mayenin (neft və qaz kondensatı) çəkilib-çıxarılmasını həyata keçirəcək nasos stansiyasının yenidənqurulması da nəzərdə tutulub.
"Günəşli" yatağı "28 May" Neft-Qaz Çıxarma İdarəsinin (NQÇİ) balansındadır.
Əvvəllər bu qaz infrastrukturun olmaması üzündən atmosferə atılırdı ki, bu da ətraf mühitə ciddi ziyan vururdu. Zəruri infrastrukturun yaradılması və bu layihənin reallaşdırılmasının dəyəri 150 milyon dollar həcmində qiymətləndirilir. Tullantıların həcmi ildə 150-250 milyon kubmetr arasında dəyişir.
