Azərbaycan, Bakı, 6 avqust /Trend, müxbir E.İsmayılov/
Xəzər dənizinin Azərbaycan sektorundakı "Babək" perspektivli strukturunda mühəndis-geoloji işlər boş gəminin olmaması səbəbindən yubanır. Bu barədə ARDNŞ-dəki (Azərbaycan Dövlət Neft Şirkəti) mənbə bildirib.
"Hazırda strukturda işlər dayandırılıb. İşlər yalnız hazırda digər işlərin yerinə yetirilməsinə cəlb olunan boş gəmilərin olacağı vaxt bərpa edilə bilər", - mənbə bildirib.
Mənbənin sözlərinə görə, buna baxmayaraq, strukturda nəzərdə tutulmuş mühəndis-geoloji işlərin ilin sonunadək başa çatdırılması planlaşdırılır. Strukturda daha sonra fotoçəkiliş və batimetriya işlərinin (dənizin dərinliyinin ölçülməsi) aparılması nəzərdə tutulur. Bu il strukturda kəşfiyyat-qazma işlərinin həyata keçiriləcəyi ehtimal olunmur.
Bundan əvvəl neft-qaz bazarındakı mənbənin verdiyi məlumata görə, "Babək" strukturunda quyu qazılması işlərinə bu il başlanmalıdır, lakin qazma işlərinin başlanması qazmanı həyata keçirəcək şirkətdən asılıdır. Qazma xidmətləri təqdim edən şirkət kimi "Caspian Drilling Company" (CDC) çıxış edir. Mənbənin sözlərinə görə, qazma işləri "İstiqlal" yarımdalma qazma qurğusunda təmir işləri başa çatdıqdan sonra başlanacaq. "Babək"də qazma üzrə layihə tapşırığı artıq hazırdır. Əvvəlcə strukturda yalnız bir quyu qazılacaq və onun layihə dərinliyi 6800 metr təşkil edəcək.
ARDNŞ-in geoloqları "Babək" strukturunun mümkün ehtiyatlarını 300 milyard kubmetr qaz və 45 milyon ton qaz kondensatı həcmində qiymətəndirirlər.
CDC ARDNŞ və "Santa Fe Corporation" şirkətlərinin birgə müəssisəsidir.
