Azərbaycan, Bakı, 14 dekabr /Trend, müxbir E.İsmayılov/
Bakı-Tbilisi-Ceyhan (BTC) neft kəmərinin buraxılış imkanlarının genişlənməsi və Bakı-Qara dəniz yeni neft kəmərinin inşası imkanları haqqında Xəzərdə Qazaxıstanın "Kaşaqan" yatağının işlənməsinin ikinci mərhələsinin həyata keçirilməsinin başlanmasına yaxın danışmaq olar. Bu barədə çərşənbə axşamı Trend-ə neft-qaz bazarında mənbə bildirilib. "Kaşaqan"ın ikinci mərhələsinin həyata keçirilməsi 2018-2019-cu illərdə gözlənilir.
Onun sözlərinə görə, Azərbaycanın neft nəqli gücü, xüsusilə də BTC neft kəməri və dəmiryolu "Kaşaqan"ın birinci mərhələsi çərçivəsində neft nəqli üçün kifayət olacaq.
Mənbə bildirib ki, hazırda neft kəmərinin fiziki buraxılış gücü bir milyon barel təşkil edir, lakin bundan əvvəl boru kəmərində BTC üzrə kimyəvi reaktivlərdən istifadə etməklə sutkada 1,2 milyon barel neft nəqli üçün bütün lazımi işlər aparılıb.
BTC üzrə sutkada orta hesabla 800-900 min barel neft nəql olunur.
Neft kəməri üzrə "Tengiz" yatağından Qazaxıstan neftinin axınının bərpası məsələsinə gəldikdə isə mənbə qeyd edib ki, axın "Tengizchevroil" ABŞ-Qazaxıstan şirkətinin bunu lazım bildiyi halda bərpa oluna bilər. Hazırda Tengiz neftinin nəqli Azərbaycan ərazisi vasitəsilə Gürcüstanın Qara dəniz sahilinə doğru istiqamətdə dəmiryoldan istifadə ilə həyata keçirilir.
BTC boru kəmərinin uzunluğu 1 768 kilometrdir ki, bunun da 443 km-i Azərbaycan, 249 km-i Gürcüstan, 1 076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci il mayın 18-də başlanılıb.
BTC-nin inşası dörd milyard dollara başa gəlib. Boru kəmərinin doldurulmasına ayrılan xərclər və bank faizlərinin ödənilməsi bura daxil deyil. Ümumi maliyyə kreditinin məbləği 2,6 milyard dollar təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
"Kaşaqan" son 30 il ərzində 4,8 milyard ton həcmində geoloji neft ehtiyatları ilə açılmış ən böyük yataqlardan biridir. Yataqda sənaye hasilatının başlaması dəfələrlə təxirə salınıb və hazırda 2012-ci ilin sonuna planlaşdırılıb.
