Azərbaycan, Bakı, 27 dekabr /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) Çin bazarına çıxışı Azərbaycanın "Azeri Light" növlü neftinin satışını diversifikasiya etməyə imkan verəcək. Bu barədə bazar ertəsi ARDNŞ rəhbəri Rövnəq Abdullayev deyib.
Onun sözlərinə görə, şirkət "Azeri Light"ı artıq bütün dünyada, o cümlədən Asiya bazarında yerləşdirib. "Çin çox böyük bazardır və bizim üçün maraq doğurur", - o, qeyd edib.
Bundan əvvəl ARDNŞ və Çinin "Zhen Rong" şirkəti Azərbaycan neftinin Çinə tədarükünə dair anlaşma memorandumu imzalayıblar. Abdullayevin sözlərinə görə, imzalanmış memorandum Azərbaycan neftini Çin və Tayvan bazarlarında satmağa imkan verəcək.
ARDNŞ rəhbəri şirkətin Sinqapur nümayəndəliyinin üzən anbarlardan istifadəsi məsələsinə də toxunub. Abdullayevin dediyi kimi, bu, "Azeri Light" neftini böyük həcmdə tədarük etməyə və bu bazarda kiçik şirkətlərə satmağa imkan verəcək, bu isə əlavə diversifikasiya və gəlir deməkdir.
Bu ay ARDNŞ və Tailandın PTT şirkəti arasında "üzən neft anbarı"ndan birgə istifadə haqqında memorandum imzalanıb. Bu memorandumun həyata keçirilməsi Azərbaycan neftinin Asiya bazarlarına tədarükünün diversifikasiyası üçün şərait yaradacaq və Azərbaycan neftinin ixracının effektivliyinə xidmət edəcək.
Bundan əvvəl ARDNŞ nümayəndələrinin bəyan etdikləri kimi, gələn il Asiyada mazut və nafta ilə ticarətin genişləndirilməsi nəzərdə tutulur. Bu, Sinqapurdakı rezervuarların lizinqini nəzərdə tutur.
"SOCAR Trading" Sinqapurdakı ofisini Asiyada xam neft ticarətinin inkişafına, eləcə də uzunmüddətli müqavilələr hesabına bazarda öz payının artırılmasına görə tam cavabdeh ofisə çevirmək niyyətindədir.
"SOCAR Trading"in Sinqapurda fəaliyyətinin genişləndirilməsi Qərbdən Şərqə mazutun arbitraj tədarükü və dünyadakı ən iri bunker limanına gəmi yanacağının satışı, eləcə də neftin saxlanılması obyektlərinin təmin olunması hesabına həyata keçiriləcək.
