Azərbaycan, Bakı, 2 mart /Trend, müxbir E.İsmayılov/
Hazırda 61 yanacaqdoldurma məntəqəsi olmaqla ARDNŞ Gürcüstanda neft məhsullarının pərakəndə satış bazarının 75 faizini əhatə edir. Bu barədə ARDNŞ rəhbəri Rövnəq Abdullayev deyib.
Onun sözlərinə görə, Gürcüstanda SOCAR brendi ilə yanacaqdoldurma məntəqələrinin sayı 100-125 ədədə çatdırılqdan sonra şirkət bazarın bu seqmentinin böyük hissəsini əhatə edəcək.
Bundan əvvəl ARDNŞ-nin Gürcüstandakı törəmə şirkəti olan "SOCAR Energy Georgia"dan dediklərinə görə, ilin sonunadək şirkət Gürcüstanda yanaqdoldurma məntəqələrinin sayını 95 ədədə çatıracaq.
"SOCAR Energy Georgia"nın həmtəsisçiləri: ARDNŞ - 51 faiz, Petro-Trans FZCO - 24,5 faiz və İvan Çxartişvili - 24,5 faiz.
Hazırda ARDNŞ Bakıda 6 YDM-ə sahibdir, lakin perspektivdə onların sayının 26-30-dək çatdırılması planlaşdırılır. Tədricən şirkət Ukraynada YDM açır, eləcə də Rumıniyada yanacaqdoldurma məntəqələrinin açılması üzrə işlər aparır.