Azərbaycan, Bakı, 5 mart/Trend, müxbir E.İsmayılov/
Yaxın vaxtlarda ARDNŞ-in Heydər Əliyev adına neft emalı zavodu və ABŞ-ın UOP şirkəti katalitik riforminqin quraşdırılması üçün işlərin aparılması üzrə texniki-iqtisadi əsaslandırmanın hazırlanmasına dair müqavilə imzalayacaqlar. Bu barədə şənbə günü ARDNŞ-dakı mənbə deyib.
Onun sözlərinə görə, hazırda müqavilənin hazırlanamsı üzrə işlər aparılır.
"İndi tezliklə imzalanacaq və TİƏ-nin hazırlanmasını nəzərdə tutan müqavilənin hazırlanması üzrə işlər aparılır", - mənbə bildirib.
Mənbənin sözlərinə görə, bu layihə qurğuda sobaların və reaktor qurğusunun transfert xəttlərinin yenidən qurulmasını əhatə edəcək.
Mənbə onu da qeyd edib ki, 2012-ci ildə avtomatlaşdırılmış idarəetmə sisteminin tətbiqi üzrə işlər aparılacaq.
Katalitik riforminq qurğusu 1980-ci il dekabrın 14-də işə salınıb, ilk məhsul isə dekabrın 16-da əldə edilib. Qurğu ABŞ-ın UOP şirkətinin texnologiyası əsasında tikilib, layihə isə Fransanın "Litvin" şirkəti tərəfindən həyata keçirilib.
Bundan əvvəl UOP şirkətinin prezidenti Raciv Qautamın rəhbərlik etdiyi nümayəndə heyəti BNEZ-də olub. Səfər zamanı NEZ rəhbəri Elman İsmayılov bildirib ki, zavod ABŞ-ın UOP şirkəti ilə öz qurğularında istehsal edilən mühərrik yağının keyfiyyətinin yaxşılaşdırılması məqsədilə yenidənqurma işlərinin aparılmasında əməkdaşlığa böyük diqqət yetirir.
ARDNŞ Azərbaycanda neft məhsullarının yeganə istehsalçısıdır. Şirkətin balansında iki NEZ var. Onlardan biri Heydər Əliyev adına zavoddur. İldə ümumi gücü 20 milyon ton olan iki zavodda ARDNŞ-nin quru və dənizdəki yataqlardan öz vəsaitləri hesabına hasil etdiyi neft emal edilir.
ARDNŞ istehsal etdiyi dizel yanacağının və benzinin keyfiyyətinin yaxşılaşdırılması üzrə işlər aparır.
ARDNŞ Avro-3 standartlı benzinin istehsalına 2012-ci ildə, Avro-3 standartlı dizel yanacağına isə 2011-ci ilin sonuna keçmək niyyətindədir. Hazırda ARDNŞ-nin istehsal etdiyi benzin və dizel Avro-2 standartına tam uyğundur.