Azərbaycan, Bakı, 12 mart /Trend/
ARDNŞ-nin (Azərbaycan Respublikası Dövlət Neft Şirkəti) Xəzər Dəniz Neft Donanmasının Gəmi təmiri zavodu bürünc və alüminiumun əridilməsi üçün yeni sobaların quraşdırılmasını başa çatdırıb. Bu barədə ARDNŞ-nin Ekologiya İdarəsinin yaydığı məlumatda deyilir.
Köhnə sobalar dizel yanacağı ilə işləyirdi ki, bu da atmosferə zərərli maddələrin atılması ilə müşayiət olunurdu. Elektrik enerjisi ilə işləyən yeni sobaların quraşdırılması isə istehsalat prosesinin ətraf mühitə ziyanlı təsirinin qarşısını almağa imkan verir.
Məlumatda bildirilir ki, zavodun tökmə sexlərində yerləşən köhnə sobalar ötən il dayandırılıb. Yeni CMHCKL-T 200 (alüminiumun əridilməsi üçün) və CMHCKL-N 200 (bürüncün əridilməsi üçün) sobalarının quraşdırılmasına başlanılıb.
"Hazırda sobaların sınaqdan keçirilməsi üzrə iş aparılır", - məlumatda deyilir.
Həmçinin, zavod yaxın vaxtlarda çuqunun əridilməsi üçün köhnə sobaların dayandırılmasını və onların yerinə ekoloji baxımdan təhlükəsiz olan yenilərinin quraşdırılmasını planlaşdırır.