Azərbaycan, Bakı, 17 may /Trend, müxbir E.İsmayılov/
2012-ci ilin birinci rübündə "Şahdəniz" yatağının işlənməsinin texniki operatoru kimi çıxış edən Britaniyanın BP şirkəti SDA03z hasilat quyusunun qazılmasını tamamlamağı planlaşdırır. Bu barədə şirkətin Azərbaycanda 2011-ci ilin birinci rübünün yekunları üzrə fəaliyyətinə dair hesabatında deyilir.
Məlumata görə, SDA03z quyusunun qazılmasına SDA06 quyusunun qazılması və istismara verilməsi üzrə işlər başa çatdıqdan sonra başlamaq planlaşdırılır. SDA06 quyusunun ilin ikinci rübündə təhvil verilməsi planlaşdırılıb.
Bir müddət əvvəl neft-qaz bazarındakı mənbənin dediyi kimi, BP SDA06 quyusu üzrə işləri başa çatdırdıqdan sonra texniki vəziyyətinin pis olması səbəbindən bir müddət əvvəl qismən dondurulan SDA-03 quyusunda yan lülənin qazılmasına başlayacaq.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
