Azərbaycan, Bakı, 21 sentyabr /Trend, müxbir E.İsmayılov/
Azərbaycan 2013-cü ilədək Türkiyə vasitəsilə Avropaya iki milyard kubmetrə yaxın həcmdə qazının nəqlinə başlamağa hazırdır. Bu məsələ ARDNŞ və Türkiyənin BOTAŞ dövlət boru kəməri şirkəti arasında razılaşdırılıb. Bu barədə jurnalistlərə çərşənbə günü ARDNŞ-nin rəhbəri Rövnəq Abdullayev deyib.
Onun sözlərinə görə, bu məsələ bundan əvvəl Azərbaycan və Türkiyə tərəfləri arasında imzalanan memorandumda da öz əksini tapıb.
"Türkiyənin mövcud qaz infrastrukturu ilə az həcmdə qazın nəqli barədə danışmaq Azərbaycanla Türkiyə arasında tranzit sazişinin əldə olunmasından sonra mümkün olacaq", - Abdullayev deyib.
Bu razılaşma çərçivəsində tədarük olunacaq qaz qismində ARDNŞ şirkətinin və "Şahdəniz" yatağının işlənməsi layihəsi konsorsiumunun məhsulu çıxış edəcək.
Abdullayev onu da qeyd edib ki, ARDNŞ tərəfindən Yunanıstan, Bolqarıstan və Suriyaya əlavə qaz həcmlərinin tədarükü haqqında qarşılıqlı anlaşma memorandumu imzalanıb.
Həmçinin, ARDNŞ-nin Yunanıstana birbaşa qaz tədarükünü nəzərdə tutan BOTAŞ və DEPA şirkətləri arasında Azərbaycan qazının ixracı barədə sazişin oriyentasiyasının dəyişdirilməsi müzakirələrin mövzusudur.
