Azərbaycan, Bakı, 20 oktyabr /Trend, müxbir A.Bədəlova/
Azərbaycan "Cənub qaz dəhlizi"nin bütün layihələrində maraqlıdır. Trend-in məlumatına görə, bunu cümə axşamı INOGATE proqramının mütəxəssislərinin görüşündə Azərbaycan sənaye və energetika nazirinin müavini Natiq Abbasov deyib.
"Azərbaycana təhlükəsiz və uzunmüddətli yeni bazarlar lazımdır", - Abbasov bildirib.
Onun sözlərinə görə, Azərbaycan dünya arenasında öz yerini tutub.
"Ölkə neft və qaz istehsalçısı kimi yaxşı tanınıb. Azərbaycan 2007-ci ilə qədər qaz idxal edirdisə, hazırda qazı qonşu dövlətlərə ixrac edir", - o deyib.
Abbasovun sözlərinə görə, 2010-cu ildə Azərbaycanda neft hasilatı rekord həddə çataraq 50 milyon tondan çox təşkil edib. Qaz hasilatı isə 26 milyard kubmetr olub.
Nazir müavini Azərbaycanın elektrik enerjisi sahəsində böyük potensialının olduğunu qeyd edib.
"Əgər 2006-ci ildə ölkədə elektrik enerjisi istehlakının payı 26 milyard kilovat-saat idisə, 2010-cu ildə bu göstərici 18 milyarda enib. Bununla da ölkənin ixracat potensialı ildə 10 milyard kilovat-saat artıb. Azərbaycan gələcəkdə elektrik enerjisini də ixrac etməyə hazırdır", - nazir müavini deyib.
Abbasov həmçinin qeyd edib ki, Azərbaycanın alternativ və bərpa olunan enerji sahəsində də potensialı var.
Azərbaycan Sənaye və Energetika Nazirliyinin investisiya və sənaye obyektlərinin yenidən qurulması şöbəsinin müdiri Ramiz Rzayevin sözlərinə görə, Azərbaycanın enerji siyasətinin əsas tərkib hissəsi enerji təhlükəsizliyinin təmin edilməsi və enerjinin effektiv istifadə edilməsi, eləcə də ölkələrin regional və qlobal enerji təhlükəsizliyinin təmin edilməsində iştirakdır.
"INOGATE proqramı çərçivəsində layihələrin həyata keçirilməsi məhz bu maraqlara xidmət edir", - Rzayeb deyib.
Onun sözlərinə görə, tədbirin əsas məqsədi Azərbaycan üçün INOGATE proqramının nəticələrinin qiymətləndirilməsi, eyni zamanda, bu proqram çərçivəsində gələcək perspektiv layihələrin müzakirəsi və burada ölkələrin iştirakıdır.
INOGATE çərçivəsində 56 proqram həyata keçirilib. Onlardan 30-na Azərbaycan qoşulub.
"Hazırda doqquz layihə həyata keçirilir, onlarin səkkizində Azərbaycan iştirak edir. Bu layihələrin həyata keçirilməsinə təxminən 36,45 milyon avro ayrılıb", - Rzayev bildirib.
INOGATE enerji sahəsində Avropa İttifaqı və tərəfdaş ölkələr - Azərbaycan, Gürcüstan, Ermənistan, Belarus, Qazaxıstan, Qırğızıstan, Moldova, Tacikistan, Türkmənistan, Ukrayna və Özbəkistan arasında beynəlxalq əməkdaşlıq proqramıdır.