Azərbaycan, Bakı, 9 dekabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) 2011-ci ilin sonuna qədər Gürcüstanda bir sıra yanacaqdoldurma məntəqələrini (YDM) istismara verəcək. Bu barədə cümə günü Trend-ə ARDNŞ-nin Gürcüstanda maraqlarını təmsil edən "SOCAR Energy Georgia"dakı mənbə məlumat verib.
"Planlaşdırılır ki, ayın sonuna qədər Gürcüstanda SOCAR brendi altında 8 YDM fəaliyyət göstərməyə başlayacaq. Bunun nəticəsində ilin sonunadək Gürcüstanda SOCAR brendi altında YDM-lərin sayı 94-95 ədədə çatacaq", - mənbə bildirib.
Onun sözlərinə görə, hazırda Gürcüstanın bütün ərazisində SOCAR brendi altında YDM-lərin sayı 85 ədəd təşkil edir.
Gürcüstanda Azərbaycan neft məhsullarının satışı məsələləri ilə "SOCAR Georgia Petroleum" MMC məşğul olur. 2006-cı ildə yaradılan "SOCAR Georgia Petroleum" "SOCAR Energy Georgia"nın 100 faizlik törəmə şirkətidir.
ARDNŞ Azərbaycanda bir sıra YDM-lərə sahibdir. Bundan başqa, SOCAR brendi altında tədricən Ukrayna və Rumıniyada YDM-lər açılır. Bu yaxınlarda Dövlət Neft Şirkəti İsveçrədə də YDM şəbəkəsi əldə edib.
