Azərbaycan, Bakı, 9 aprel /Trend, müxbir E.İsmayılov/
Qaz təchizatı və qazlaşdırmanın yaxşılaşdırılması çərçivəsində ARDNŞ-nin (Azərbaycan Respublikası Dövlət Neft Şirkəti) "Azəriqaz" İstehsalat Birliyi (İB) aprel-may aylarında Azərbaycanın bir sıra yaşayış məntəqələrinə qazın verilişinə başlayacaq. Bu barədə bazar ertəsi Trend-ə İB-dən bildiriblər.
Hazırda qazlaşdırma, yeni qaz kəmərlərinin çəkilməsi və yeni abunəçilərin əhatə edilməsi üzrə işlər aktiv şəkildə aparılır.
"Xüsusən, ayın ikinci yarısından ölkənin bir çox regionlarına, o cümlədən sərhədyanı bölgələrə qazın verilişinə başlanacaq", - İB-dən qeyd ediblər.
Qeyd edək ki, qazlaşdırma proqramı çərçivəsində ARDNŞ 2013-cü ilədək ölkədə qazlaşdırmanın səviyyəsini xeyli yüksəltməyi planlaşdırır. Bu dövrədək qazlaşdırma prosesi 90 faizi ötəcək.