Azərbaycan, Bakı, 6 mart /Trend, müxbir E.İsmayılov/
2014-cü ilin birinci yarısında Lerik rayonunda 16,5 meqavat gücündə modul elektrik stansiyasını istismara vermək planlaşdırılır. Trend-in məlumatına görə, bu barədə Nazirlər Kabinetinin 2013-cü ilin yekunları ilə bağlı Milli Məclisə təqdim etdiyi hesabatda qeyd olunub.
Hesabata əsasən, elektrik stansiyası Azərbaycanın cənub bölgəsini etibarlı və stabil elektrik enerjisi ilə təmin etmək üçün tikilir.
2013-cü ildə ölkədə ümumi gücü 14,3 meqavat olan 10 kiçik su elektrik stansiyasının (SES) tikintisi üzrə işlər aparılıb. İki kiçik SES-in - "Göyçay-1" (3,3 meqavat) və "İsmayıllı-1"-in (1,6 meqavat) tikintisi artıq başa çatıb.
Sənəddə bildirilir ki, 2014-cü ilin sonunda Azərbaycanın "Şimal" elektrik stansiyasında (409 meqavat) ikinci buxar-qaz qurğusunun istismara verilməsi planlaşdırılır.
İkinci buxar-qaz qurğusunun tikintisi Abşeron rayonunun enerji təhlükəsizliyinin möhkəmləndirilməsi baxımından önəm kəsb edir.
Hazırda elektrik stansiyası Bakı və Abşeronun elektrik enerjisinə tələbatının 25 faizini qarşılayır. İkinci blokun tikintisi ilə bu göstərici 35-40 faizə çatacaq. İkinci enerji blokunun tikintisi Yaponiyanın "Toyo Engineering" şirkəti ilə bağlanmış müqavilə əsasında aparılır.
Hazırda "Şimal" elektrik stansiyasında 400 meqavat gücündə bir buxar-qaz qurğusu var.
