Azərbaycan, Bakı, 13 may /Trend, müxbir E.İsmayılov/
Konsepsiyaya əsasən, Azərbaycanda qaz-kondensat yataqlarının işlənməsi üzrə iki layihənin iştirakçısı olan Fransının "Total" şirkəti operatoru olduğu layihələr çərçivəsində bütün diqqətini fəaliyyətin inkişaf etdirilməsinə yönəltmək niyyətindədir.
Trend-in məlumatına görə, bunu çərşənbə axşamı jurnalistlərə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev "Total"ın "Şahdəniz" yatağının işlənməsi layihəsində iştirak payını satması ilə bağlı məlumatı şərh edərkən deyib.
Onun sözlərinə görə, "Total" strategiyası çərçivəsində cüzi iştirak payına sahib olduğu layihələrdən qlobal səviyyədə uzaqlaşmaq və diqqətini əməliyyat apardığı layihələrə yönəltmək niyyətindədir.
"Total"ın "Şahdəniz" layihəsindən çıxacağı təqdirdə, ARDNŞ-nin həmin layihədə iştirak payını artırmaq üzrə planlarına toxunan R.Abdullayev qeyd edib ki, bütün bunlar əlavə vəsait tələb edir. ARDNŞ prezidenti nümunə olaraq Avropaya qaz tədarükünün təmin edilməsi çərçivəsində layihələrin maliyyə tutumluluğuna görə dövlətin yardımı ilə icra edildiyini göstərib: "Bu o deməkdir ki, şirkətin məhdud resurs bazası var, yeni layihələrdə iştirak və aktivlərin əldə olunması əlavə maliyyə qoyuluşları tələb edir".