Azərbaycan Dövlət Neft Şirkəti (AR DNŞ) Gürcüstanın Batumi limanından Azərbaycan Beynəlxalq Əməliyyət Şirkəti tərəfindən "Azəri-Çıraq-Günəşli" yataqları blokunda hasil edilən Azəri Light növlü bir partiya mənfəət neftinin satışı üzrə tender elan edib.
ABƏŞ-də 10% paya malik olan AR DNŞ-dən Trend ə verilən məlumata görə, tender dekabrın 1-5-də yüklənəcək 80 min ton (600 min barel) neftin satışı üzrə elan edilib. "Tenderin noyabrın 16-da bağlı elan edilməsi nəzərdə tutulub", - deyə şirkətdən bildirilib.
Batumidən 80 min ton neftin satışı üzrə elan edilmiş əvvəlki tenderin qalibi Almaniyanın Select Energy Trading şirkəti olub.
Batumi neft terminalı ildə 15 mln tona qədər neft daşımaq qabiliyyətinə malikdir. Terminal 4 körpüdə 30-90 min ton dedveytli tankerlərə xidmət edir. Hazırda onun rezervuar parkının gücü təxminən 530 min tondur ki, bu da dəhlizdən keçən cari və proqnoz həcmlərin daşınması üçün böyük göstəricidir.