"Neft daşları" yatağında quraşdırılacaq yeni platformada qazma işlərinə başanması və hasilat bu ilin sonunda gözlənilir. Bu barədə Trend ə energetika və sənaye Nazirliyindən məlumat verilib.
Yaxın vaxtlarda platformadan hasilatın 1-ci fazasına başlamaq nəzərdə tutulur. AR DNŞ-in neft və qaz hasilatı üzrə "Azneft" İB yatağın bu hissəsində qazılmış 4 quyunu platformanın özülü ilə birləşdirmək və hasilata başlamaq niyyətindədir.
Bu quyuların hər birinin sutkalıq debiti 25-30 tondur. Quyuların ümumi debiti isə sutkada 120 tondur. İstismar zamanı yeni platformadan 2000-2200 m dərinliyində 32 quyunun qazılacağı nəzərdə tutulur. Hər quyunun debitinin sutkada 50-60 ton olacağı gözlənilir. Yeni platformada qazma işləri 4-5 il ərzində aparılacaq. Platformanın istismara verildiyi 1-ci il "Neft Daşları" yatağında hasilatın sutkada 2300 tondan 2450 tonadək artacağı planlaşdırılır.
"Neft Daşları" 1949-cu ildən işlənir. Bir NQÇİ-nin tərkibinə daxil olan "Neft Daşları" və "Palçıq təpə" yataqlarının istismara verildiyi dövr ərzində bu yataqlardan 173 mln tondan çox neft hasil edilib. Hazırda 460 istismar quyusundan sutkada təxminən 2300 ton neft hasil edilir. Yatağın qalıq ehtiyatları 30 mln ton həcmində qiymətləndirilir.
