Yanvar-sentyabr aylarında Rusiyanın "Qazeksport" şirkəti ("Qazprom" ASC-nin törəmə qurumu) Azərbaycana 3 mlrd. 309,5 mln. kubmetr qaz göndərib. Trend in xəbər verdiyi kimi, bu barədə Azərbaycan Dövlət Neft Şirkətindən məlumat verilib.
Sutkada orta hesabla 12,2 mln. kubmetr qaz tədarük edilib. Keçən ilin 9 ayı ərzində şirkət Azərbaycana 3 mlrd. 486 mln. kubmetr qaz göndərib.
Bu ilin sentyabrında şirkətin tədarük həcmi 324 mln. kubmetr qaz təşkil edib. Keçən ilin sentyabrında Azərbaycana 240,2 mln. kubmetr qaz göndərilib. Oktyabrda 372 mln. kubmetr qazın (sutkada 12 mln. kubmetr) alınması nəzərdə tutulub.
Cari ildə ARDNŞ "Qazeksport"dan min kubmetri $110 olan 4,5 mlrd. kubmetr qaz almağı planlaşdırır. Təbii qaz ölkəyə Şirvanovka-Qazıməmməd boru kəməri ilə ötürülür.