Azərbaycan, Bakı, 24 iyun/ Trend , müxbir S.Babayeva/ Azərbaycanın Rabitə və İnofrmasiya Texnologiyaları Nazirliyi ölkənin üç GSM operatoruna üçüncü nəsil rabitə xidmətləri 3G üçün tezliklərin istifadəsi üzrə təklif və tövsiyələr təqdim edib. Bu barədə çərşənbə axşamı dövlət idarəsindən məlumat veriblər.
"Hər üç rabitə operatoruna tezliklər təklif olunub. Onlar tezlikləri artıq öz aralarında razılaşdırmalıdırlar. Tezliklər hamıya çatacaq", - Rabitə Nazirlyində hesab edirlər.
Azərbaycanda dörd mobil rabitə operatoru fəaliyyət göstərir. Onlardan üçü - Azercell Telecom, Bakcell və Azerfon GSM, biri - Catel CDMA standartı üzrə fəaliyyət göstərir. Ölkədə mobil rabitə abunəçilərinin ümumi sayı təqribən 5 mln. nəfərdir.
Əvvəllər hər üç GSM operatoru ölkədə 3G xidmətləri göstərmək arzusunu bildiriblər.
Tezliklər razılaşdırıldıqdan sonra, radiotezliklər üzrə Dövlət Komissiyası tərəfindən rəsmi olaraq ayrılacaqlar.
3G standartı Beynəlxalq Rabitə İttifaqı tərəfindən hazırlanıb və IMT-2000 (International Mobile Telecommunications 2000) adlanır. 3G - "üçüncü nəsil" İnternet şəbəkəsinin xidmətləri ilə yüksəksürətli mobil çıxış və məlumatın ötürülməsi kanalları yaradan radiorabitə texnologiyasını özündə birləşdirir. 3G üçüncü nəsil şəbəkələri məlumatları 2Mbit/s sürətlə göndərərək, təqribən 2GHz diapazonlu tezliklərdə işləyirlər. Onlar videotelefoniya təşkil etmək, mobil telefonda film və teleproqramlara baxmaq imkanı yaradır.
