...

İnsan Resursları Fondunun İKT-nin Azərbaycanda inkişaf etdirilməsi üzrə ilk iclasının tarixi təyin edilib

Telekommunikasiya Materials 27 İyun 2008 15:13 (UTC +04:00)

Azərbaycan, Bakı, 27 iyun / Trend , müxbir C.Babayeva/ 2006-cı ildə təsis edilmiş İnsan Resursları Fondunun infomasiya-kommunikasiya texnologiyalarının inkişaf etdirilməsi üzrə ilk iclası iyul ayının ilk həftəsində keçiriləcək, - cümə günü İnformasiya Texnologiyaları və Rabitə Nazirliyindən bildiriblər.

"Bütün təşkilati məsələlər həll edilib. Təkcə fondun ilk iclasının keçirilməsi qalıb", -nazirlikdən deyiblər.

İclasda idarə heyətinin üzvləri seçiləcək və infomasiya-kommunikasiya texnologiyaları sahəsində xaricdə təhsillə bağlı yerli kadrlara köməkliyin göstərilməsi barədə iş planı müəyyən ediləcək.

Fondun qeyri-hökumət təşkilatı qismində yaradılması təşəbbüsünü İnformasiya Texnologiyaları və Rabitə Nazirliyinin rəhbərliyi və İT şirkətləri irəli sürüb.

Fondun tərkibinə 15 İT şirkəti daxildir. Bunlar AZEL, Sinam, Ultra, Catel, Azercell, Bakcell, Azerfon, Microsoft və s. şirkətlərdir. Gələcəkdə fondun tərkibinin genişlənməsi Azərbaycanda fəaliyyət göstərən digər şirkətlər hesabına arta bilər.

Hazırda İnformasiya Texnologiyaları və Rabitə Nazirliyinin xətti ilə Ukraynanın, ABŞ-ın, Koreyanın ali məktəblərində 30 nəfərdən artıq şəxs təhsil alır. Fond fəaliyyətə başladıqdan sonra tələbələrin təhsil alması, maliyyə mənbəyi şəxsi şirkətlərdən və İnformasiya Texnologiyaları və Rabitə Nazirliyindən formalaşan fondun hesabına həyata keçiriləcək.

Xəbər lenti

Xəbər lenti