Azərbaycan, Bakı, 24 fevral / Trend /
Azərbaycan Rabitə və İnformasiya Texnologiyaları Nazirliyinin (RİTN) və Fövqəladə Hallar Nazirliyinin (FHN) nümayəndə heyəti təbii fəlakətlərin nəticələrinin aradan qaldırılması üçün İnformasiya-Kommunikasiya Texnologiyalarından (İKT) istifadə olunmasına həsr olunmuş iclasda iştirak edəcək", - Rabitə Nazirliyindən məlumat verilib. İclas fevralın 25-27-də Bişkekdə baş tutacaq.
"Tədbir BMT-nin 2009-cu il üçün Mərkəzi Asiya ölkələrinin iqtisadiyyatı üzrə xüsusi proqramın (SPECA) bir hissəsidir və onun keçirilməsi haqda qərar ötən il noyabrın 12-də Bakıda keçirilən iclasda qəbul olunub", - qurumun məlumatında deyilir.
Görüşdə tərəflər İKT-nin tətbiqi üsullarını və təbii fəlakətlərlə mübarizə üçün əməkdaşlığın regional mexanizmlərini müzakirə edəcəklər. Təbii fəlakətlərin xəbərdarlıq olunması ilə bağlı xidmət və mövcud sistemlərin birgə istifadəsi üçün Mərkəzi Asiya və Qafqaz ölkələri arasında gələcək inkişaf və əməkdaşlıq üzrə fikir mübadiləsi aparılacaq.
Tədbirdə iştirak edəcək dövlətlərin nümayəndələrinə bir sıra müvafiq təşəbbüslər, o cümlədən realizəsinə 2007-ci ildə başlanılmış Wideband InterNetworking engineering test and Demonstration Satellite layihəsi nümayiş etdiriləcək.
Görüşün təşkilatçıları qismində Qırğızıstan Respublikasının FHN və BMT-nin Asiya və Sakit Okean ölkələri üzrə İqtisadi və Sosial Komissiyası (UNESCAP) çıxış edir.
