Azərbaycan, Bakı, 29 iyun / Trend , müxbir Q.Vəliyev /
Zaqatala və Balakəndə "İnformasiya texnologiyaları akademiyası" layihəsi çərçivəsində İT treninqlərin keçirilməsinə start verilib. Hər iki regionda layihənin açılış mərasimi iyunun 29-da baş tutub. Tədbirlərdə rayon İcra Hakimiyyəti nümayəndələri, təhsil şöbələri və layihənin gələcək iştirakçıları - kompyuter biliyinə malik olmayan gənclər iştirak ediblər.
Layihə "İrəli" İctimai Birliyi tərəfindən gənclərin kompyuter biliklərinin artırılması məqsədi ilə həyata keçirilir. Rabitə və İnformasiya Texnologiyaları Nazirliyi layihəyə birbaşa dəstək göstərir.
Ölkənin bütün regionlarını əhatə edəcək layihə mərhələli şəkildə həyata keçirilir. Hazırda treninqlər Gəncə, Qazax, Ağstafa, Şəmkir və Tovuzda keçirilib.
Gəncədə kursun 270 iştirakçısından 188 nəfəri, Qazax rayonunda 135 iştirakçıdan 106 nəfəri, Ağstafada 134 iştirakçıdan 86 nəfəri, Şəmkirdə 130 iştirakçıdan 102 nəfəri, Tovuzda 135 iştirakçıdan 88 nəfəri sertifikat əldə edib.
İlin sonuna qədər İT treninqlərin keçirilməsi, müəllimlərin, yeniyetmə və gənclərin ibtidai biliklərinin formalaşdırılması və İT qrupun yaradılması vasitəsi ilə layihəyə 50 min adam cəlb ediləcək.
