Azərbaycan, Bakı, 16 dekabr / Trend , müxbir H. Vəliyev/
Mobil rabitə operatoru Azercell Rabitə və İnformasiya Texnologiyaları Nazirliyindən lisenziya aldıqdan dərhal sonra 3G şəbəkəsini işə salacaq, şirkətin baş direktoru Əli Aqan jurnalistlərlə söhbətində deyib.
Onun sözlərinə görə, lisenziyanın verilməsi məsələsi ən yaxın vaxtlarda həll olunmalıdır.
"Əgər Azercell-in 2G standartı bazasında fəaliyyət göstərən indiki mövcud şəbəkə strukturuna baxsaq, şirkətin baza stansiyalarının sayı digər GSM operatorlarının baza stansiyalarının sayını ötür, şəbəkə infrastrukturunun texniki imkanları isə bir çox Avropa operatorlarının parametr göstəricilərini ötür", - Aqan deyib.
Onun sözlərinə görə, Azercell 3G standartını Azərbaycan bazarına 2G standartını təqdim etdiyi prinsiplər əsasında təqdim edəcək, belə ki, onun işə salınması bütün respublika üzrə eyni zamanda olacaq. "3G-nin işə salınması yalnız avadanlıqların qurulması ilə bağlı deyil, həm də ondan savadlı şəkildə istifadə ilə bağlıdır. Biz ən qabaqcıl texnologiyalarla işləyirik və 2G ilə qazandığımız uğuru 3G standartı ilə də əldə etmək niyyətindəyik", - Aqan deyib.
Bu gün 3G üzrə lisenziyanın dəyəri 11 min manat təşkil edir. Hazırda Azercell Telecom tərəfindən Azərbaycanın telekommunikasiya sektoruna 1 miyard dollardan çox vəsait qoyulub.
Məqalə müəllifi ilə əlaqə ünvanı: [email protected]
