Azərbaycan, Bakı, 24 aprel /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi "İntersputnik" Beynəlxalq Kosmik Rabitə Təşkilatının (BKRT) fəaliyyəti üzrə qərarların qəbul edilməsində və nəzərdən keçirilməsində iştirak edəcək. Bu barədə nazirlikdən Trend-ə məlumat veriblər.
Bu məsələ aprelin 27-28-də Da Nanq (Vyetnam) şəhərində "İntersputnik" İstismar Komitəsinin 11-ci və Şuranın 38-ci birgə iclası zamanı nəzərdən keçiriləcək.
Birgə iclasda "İntersputnik"in ötənilki fəaliyyətinin əsas nəticələri barədə hesabat təqdim ediləcək.
Növbəti iclasın Vyetnamda keçirilməsinə dair qərar "İntersputnik" Şurasının və İstismar Komitəsinin ötən il aprel ayında Bakıda keçirilmiş 37-ci birgə sessiyası zamanı qəbul edilib.
"İntersputnik" BKRT dünyanın ilk peyk operatorlarından biridir və 25 ölkəni birləşdirir. Təşkilatın əsas fəaliyyəti rabitə operatorlarını, yayım şirkətlərini icarəyə vermək, həmçinin "İntersputnik Holdinq"in törəmə müəssisələri vasitəsilə peyk rabitəsinin yaradılması və istismarı sahəsində kompleks xidmətlər göstərməkdən ibarətdir.
Azərbaycan "İntersputnik" sisteminə rəsmi olaraq 2004-cü ilin sonunda qoşulub. BKRT-yə üzvlük Azərbaycana dünyanın müxtəlif regionlarına çıxış və teleradio proqramlarının yayımlanması üçün sərfəli şərtlərlə kosmik əlaqələrdən istifadə imkanı verir.
