Azərbaycan, Bakı, 25 sentyabr /Trend, müxbir H.Vəliyev/
"Microsoft Azerbaijan" "Microsoft Windows 7" əməliyyat sisteminin Azərbaycan dilinə lokallaşdırılması işlərini başa çatdırıb. Bu barədə Trend-ə cümə günü "Microsoft Azerbaijan" Nümayəndəliyinin rəhbəri Teymur Axundov məlumat verib.
Axundovun sözlərinə görə, məhsulun lokallaşdırılmış versiyası ilk dəfə "BakuTel-2010" 16-cı Beynəlxalq Telekommunikasiya və İnformasiya Texnologiyaları Sərgisi (23-26 noyabr) çərçivəsində nümayiş olunacaq.
"Microsoft Azerbaijan" Nümayəndəliyi rəhbərinin sözlərinə görə, "Microsoft Office 2010" ofis paketinin lokallaşdırılması üzrə işlər ayrıca aparılır və 2011-ci ilin ortalarında başa çatacağı gözlənilir.
Axundovun əvvəllər dediyinə görə, əməliyyat sistemlərinin lokallaşdırılması xarici podratçılar tərəfindən aparılır.
Bugünədək "Microsoft"un Azərbaycan dilinə lokallaşdırılmış məhsulları arasında "Windows XP" və "Windows Vista", eləcə də "Microsoft Office 2003" və "Microsoft Office 2007" ofis paketləri də var.
"Windows XP" və "Microsoft Office 2003" proqram məhsullarının ilk lokallaşdırılması AZEL şirkəti tərəfindən, "Windows Vista" və "Microsoft Office 2007" məhsullarının Azərbaycan dilinə tərcüməsi SINAM şirkəti tərəfindən həyata keçirilib.
Sistemin lokallaşdırılması MUI-fayllarının Azərbaycan dilinə tərcüməsini nəzərdə tutur.
Axundovun sözlərinə görə, "Microsoft Windows 7" əməliyyat sisteminin özünün qlossariyasına gəldikdə, o, bir çox hallarda əvvəlki versiyalarla üst-üstə düşür. Lakin eyni zamanda, hazırkı baza genişləndirilib və daha çox sayda yeni terminləri ehtiva edir.
