Azərbaycan, Bakı, 30 sentyabr /Trend, müxbir H.Vəliyev/
Regional Rabitə Birliyinin (RRB) İnformasiya təhlükəsizliyi komissiyasına MDB ölkələri arasında beynəlxalq informasiya mübadiləsində elektron sənədlərin hüquqi əhəmiyyətinin tanınması haqqında Konvensiya hazırlamaq həvalə olunub. Bu barədə RRB-dən verilən məlumatda deyilir.
Bununla bağlı qərar sentyabrın 28-də Kişinyovda (Moldova) keçirilən RRB yanında informasiyalaşdırma üzrə MDB ölkələrinin Koordinasiya Şurasının 16-cı iclasında qəbul olunub.
İclasda Azərbaycanı rabitə və informasiya texnologiyaları nazirinin müavini İltimas Məmmədov təmsil edib.
Konvensiyanın hazırlığında Belarus, Qazaxıstan və Rusiyanın xarici və qarşılıqlı ticarət üzrə elektron sənəd mübadiləsində informasiya texnologiyalarınınn tətbiqi məsələlərində qarşılıqlı təsir üzrə bu ölkələrin təcrübəsindən istifadə etmək tövsiyə olunub.
Komissiyaya həmçinin MDB ölkələri səlahiyyətli orqan və təşkilatlarının kriptoqrafiya funksiyaları ilə İKT məhsullarının idxal və ixracının nizamlanmasına nəzarətlə bağlı texnologiya tətbiqi və transsərhəd informasiya mübadiləsinin həyata keçirilməsi zamanı yaranan problemlərin həll edilməsinə dair əsaslar hazırlamaq həvalə olunub. Bu məsələ çərçivəsində RRB-nin İqtisadiyyat və rabitə məsələləri üzrə komissiyasına 2011-2013-cü illərdə MDB çərçivəsində transsərhəd informasiya mübadiləsinin pilot layihə sisteminin yaradılması üzrə elmi-tədqiqat və təcrübi-konstruktiv işlərin aparılması mümkünlüyünə baxmaq həvalə olunub.
RRB çərçivəsində MDB-yə üzv olan ölkələrin kiberməkanında təhlükəsizliyin təminatı üzrə "vahid mərkəz"in yaradılması ilə bağlı işlərin görülməsini nəzərə alaraq, Şura informasiya təhlükəsizliyi komissiyasına "vahid mərkəz"in yaradılması üzrə tədbirlərin siyahısını Koordinasiya Şurasının növbəti iclasına təqdim etməyi həvalə edib.
