Azərbaycan, Bakı, 7 sentyabr /Trend, müxbir H.Vəliyev/
Azərbaycanda elektron rəqəmsal imzaların verilməsi üzrə infrastrukturun işə salınması "BakuTel 2011" Beynəlxalq Telekommunikasiya və İnformasiya Texnologiyaları sərgisi və konfransının açılışı ərəfəsində gözlənilir. Bu barədə çərşənbə axşamı Trend-ə Rabitə və İnformasiya Texnologiyaları Nazirliyinin informasiya cəmiyyətinin inkişafı şöbəsinin müdiri İsfəndiyar Əliyev deyib.
Əliyevin sözlərinə görə, hazırda elektron rəqəmsal imzaların verilməsi infrastukturunun və "Elektron hökumət" portalının hazırlanması üzrə işlər aparılır.
"Bəzi dövlət idarələri artıq serverlərin instalyasiyasına və elektron imzanın tətbiqi ilə elektron xdimətlərin göstərilməsi üçün öz infrastukturlarının yaradılmasına başlayıblar. Ölkənin Vergilər Nazirliyində elektron xidmətlərin olması səbəbindən biz nazirliyə hüquqi şəxslərin vergi bəyannamələrini elektron imza tətbiq etməklə təqdim etmələrinə görə müraciət etmişik", - Əliyev qeyd edib.
Əliyevin dediyinə görə, rəqəmsal imzanın qiymətinə gəldikdə, nazirlik bir neçə variantı nəzərdən keçirir.
"Qiymətlər istifadəçi kateqoriyasından asılı olaraq müəyyənləşdiriləcək. Həm bir neçə dəfə, həm də birdəfəlik imzanın metodları tətbiq ediləcək. Son üsul Tələbə Qəbulu üzrə Dövlət Komissiyasına ərizə verən abituriyentlər üçün əlverişlidir", - Əliyev vurğulayıb.
Elektron imzadan infrastrukturu onun tətbiqinə imkan verən nazirliklərdə istifadə etmək mümkün olacaq. Hazırda elektron xidmətlər artıq Dövlət Gömrük Komitəsində və Vergilər Nazirliyində tətbiq edilir.
Dövlət idarələri tərəfindən göstərilən bütün elektron xidmətlər, eləcə də yaranacaq yeni xidmətlər "Elektron hökumət"in vahid portalına köçürüləcək.
Portal nazirliklərin bir-biri ilə elektron şəkildə fəaliyyət göstərməsi sayəsində vətəndaşlardan tələb olunan sənədlərin sayının azaldılmasına yönəlib.
"Elektron hökumət" portalının yaradılmasında mövcud informasiya bazalarını və müxtəlif platformalarda yaradılan sistemləri birləşdirəcək X-Road sisteminin prinsipindən istifadə olunacaq. X-Road sistemi müxtəlif dövlət təşkilatlarının məlumat bazalarını birləşdirməyə, əhaliyə kompozit xidmətlər göstərməyə, eləcə də "dövlət-vətəndaş" dialoqunun aparılması imkanı ilə interaktiv servisləri təqdim etməyə imkan verəcək.
