Azərbaycan, Bakı, 24 may /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi mobil rabitə operatorlarına rouminq xidmətləri tariflərinin azaldılması imkanına baxmaq barədə təkliflə müraciət edib. Trend-in məlumatına görə, bu barədə çərşənbə axşamı Azərbaycan rabitə və informasiya texnologiyaları nazirinin müavini İltimas Məmmədov deyib.
Məmmədovun sözlərinə görə, əsas arqument odur ki, cari il respublikada "Turizm ili" elan edilib və buna uyğun olaraq turistlər üçün bu və ya digər xidmətlər, o cümlədən rouminq xidmətlərinin əlverişli tarifləri əhəmiyyət kəsb edir.
Nazir müavininin sözlərinə görə, son ay ərzində Azərbaycanın mobil rabitə operatorları tərəfindən artıq rouminq tariflərinin azaldılması üzrə müəyyən təkliflər irəli sürülüb.
"Rouminq xidmətləri üçün tariflər istiqamətdən asılı olaraq fərqlənir. Üç faizlik azalmanı nəzərdə tutan istiqamət və orta hesabla 50 faiz azalmanın nəzərdə tutulduğu istiqamət var", - Məmmədov bildirib.
Belə ki, məsələn, rouminq tariflərinin 50 faizlik azalması ərəb ölkələri istiqamətində mümkündür. Onlarla bir dəqiqəlik danışığın qiyməti 4 dollara başa gəlir. Lakin bunun Türkiyə ilə danışıqlar üçün edilməsi planlaşdırılmır, çünki bu istiqamətdə tariflər onsuz da minimaldır.
"Bu məsələ mərhələ-mərhələ həll edilir", - nazir müavini qeyd edib.
Hazırda Azərbaycanda 3 mobil rabitə operatoru - Bakcell, Azercell və Azerfon fəaliyyət göstərir.
Rouminq tariflərinin azaldılması məsələsi ötən ilin sonunda Azərbaycanın rabitə administrasiyasının təşəbbüsü ilə Regional Rabitə Birliyinin müzakirəsinə çıxarılıb.
