Azərbaycan, Bakı, 14 iyul /Trend, müxbir H.Vəliyev/
Türkiyənin "Turk Telecom" operatoru "Şərq-Qərb" layihəsinin iştirakçısı olan ölkələrin Avropanın ən iri operatorları ilə əlaqələndiricisi kimi çıxış edəcək. Bu barədə Trend-ə cümə axşamı "Şərq-Qərb" layihəsi üzrə işçi qrupunun rəhbəri İlyas Naibov-Əylisli deyib.
Naibov-Əylislinin sözlərinə görə, söhbət "Turk Telecom"un bölməsindən - "Pantel" şirkətindən gedir. Şirkətin nümayəndələri bu günlərdə Qəbələdə keçirilən "Şərq-Qərb" layihəsinin iştirakçısı olan ölkələrin görüşündə iştirak ediblər.
Məlum olduğu kimi, layihəyə Azərbaycan, Rusiya, Qazaxıstan, Türkiyə və Çinin aparıcı telekommunikasiya operatorları cəlb ediliblər.
"Pantel" şirkəti Mərkəzi, Cənubi və Şərqi Avropada iri alternetiv telekommunikasiya operatorudur. Şirkətin mülkiyyətində kabel kanalizasiyalarından, optik-lif naqillərdən ibarət 27 min kilometrdən artıq magistral rabitə xətti, eləcə də DWDM bərkitmə avadanlıqları və Türkiyədə məlumatların ötürülməsi milli şəbəkəsinə çıxışa malikdir. Bu, kabel tikililərinin keçdiyi müstəqil marşrutlara, onların vəziyyəti və avadanlıqların işinin parametrləri üzərində birbaşa nəzarətə malik olmağa imkan verir.
"Şərq-Qərb" informasiya supermagistralının buraxılış qabiliyyətinə gəldikdə, İlyas Naibov-Əylislinin sözlərinə görə, o, terabitlərlə hesablanacaq.
BMT-nin 66-cı plenar iclası çərçivəsində "Şərq-Qərb" transmilli informasiya supermagistralının yaradılması üzrə Azərbaycanın təqdim etdiyi təşəbbüsün qəbul edilməsi optik-lif kabel magistralının Xəzər seqmentinin çəkilişi üzrə həll olunmamış bütün təşkilati məsələləri də aradan qaldıracaq.
BMT yoxsulluq səviyyəsinin aşağı salınmasına, iqtisadiyyatın səviyyəsinin artırılmasına istiqamətlənən və regionun inkişafı üçün lokomotiv rolunu oynayacaq layihəni alqışlayıb.
"Şərq-Qərb" layihəsi ümumilikdə 20 ölkəni birləşdirəcək və regionun inkişafı üçün mühüm rol oynayacaq. Layihənin həyata keçirilməsi Qərbi Avropa və Sakit okean hövzəsinə daxil olan ölkələr arasında "informasiya uçurumu"nu aradan qaldırmağa imkan verəcək.