Azərbaycan, Bakı, 22 dekabr / Trend, müxbir H.Vəliyev /
Rabitə və İnformasiya Texnologiyaları Nazirliyinin "Aztelekom" İstehsalat Birliyinin sabit telefon şəbəkəsi abonentlərinin "107" xidmətindən istifadə etməklə bütün mobil telefon şəbəkəsi abonentlərinə SMS-lərin göndərilməsi xidmətindən 2011-ci il ərzində əldə etdiyi gəlirləri 160 min manat artıb. Trend-in məlumatına görə, bu barədə cümə axşamı nazirliyin məlumatında deyilir.
Nazirliyin məlumatına görə, ilin əvvəlindən bu xidmətdən istifadə edənlərin sayı artıb.
Xidmətdən istifadə üçün abonent "107"-yə zəng edib SMS göndərmək arzusunu bildirərək, SMS-in mətnini telefonla diktə edir və SMS-in çatacağı mobil telefonu söyləyir. Qəbul edilmiş SMS "107" xidməti tərəfindən lazımi ünvana çatdırılır.
Dövlət operatorunun qısa ismarıcların göndərilməsi üzrə xidməti 2009-cu ildə Aztelekom və GSM-operatorları (Azercell, Bakcell, Azerfon) arasında bağlanan saziş əsasında istismara verilib. Bu abonentlərə SMS səsvermə yolu ilə keçirilən müsabiqələrdə iştirak etməyə imkan verir.
Dekabrın 22-nə olan rəsmi məzənnə 0,7863 AZN/USD təşkil edir.