Azərbaycan, Bakı, 10 yanvar /Trend, müxbir H.Vəliyev/
Azərbaycanda əqli mülkiyyət sahəsində uzunmüddətli strategiya hazırlanır. Bu barədə çərşənbə axşamı Trend-ə Azərbaycan Müəllif Hüquqları Agentliyinin Əsərlərin qeydiyyatı və hüquq şöbəsinin müdiri Xudayat Həsənli bildirib.
Həsənlinin sözlərinə görə, strategiyanın əsas məqsədi əqli mülkiyyət sisteminin inkişafı hesabına cəmiyyət və dövlətin maraqlarını təmin etməkdir.
Bu məqsədə çatmaq üçün üç əsas istiqamət müəyyən edilib: əqli mülkiyyət hesabına elm və mədəniyyət üçün əlverişli mühitin təmin edilməsi, əqli mülkiyyətin biliklərə söykənən iqtisadiyyatın inkişafının güclü alətinə çevrilməsi və informasiya cəmiyyətinin inkişafı üçün əqli mülkiyyətin potensialının istifadə imkanlarının təmin edilməsi.
"Başlanğıcda strategiya birbaşa müəllif hüquqları sahəsini əhatə edirdi. Lakin Ümumdünya Əqli Mülkiyyət Təşkilatının təklifinə əsasən, strategiyaya sənaye mülkiyyəti hüquqları da daxil edilib. Strategiya Müəllif Hüquqları Agentliyi və Standartlaşdırma, Metrologiya və Patent üzrə Dövlət Komitəsinin birgə səyi ilə hazırlanır. Dövlət Komitəsi, öz növbəsində, sənaye mülkiyyət hüquqları üzrə öz variantını təqdim edib, bundan sonra hazırda müzakirə mərhələsində olan strategiyanın yekun variantı formalaşdırılıb", - Həsənli deyib.
Onun sözlərinə görə, yaxın müddətdə sənədin baxılması üçün hökumətə təqdim edilməsi gözlənilir. Strategiyanın qəbulu bu il gözlənilir.
Strategiyada əqli mülkiyyət sahələrinin problemləri öz əksini tapıb, saxta məhsulların istehsalı və satışı ilə mübarizə metodları və s. daxil edilib. Ümumilikdə, strategiya 30 məqsədli istiqaməti nəzərdə tutur ki, burada təxminən 90 konkret tədbir birləşdirilib.
Azərbaycan Müəllif Hüquqları Agentliyinin rəhbəri Kamran İmanov əvvəl Trend-ə bildirmişdi ki, Azərbaycan dünyada əqli mülkiyyət sahəsində uzunmüddətli milli strategiyanın qəbul ediləcəyi ilk ölkələrdən biri ola bilər.
