Azərbaycan, Bakı, 26 noyabr /Trend, müxbir E.Əliyev/
Azərbaycan Rabitə və İnformasiya Texnologiyaları Nazirliyi Fransa tərəfi ilə Azərbaycanın ikinci peykinin buraxılması ilə bağlı danışıqlar aparır. Bu barədə maliyyə naziri Samir Şərifov çərşənbə axşamı Bakıda keçirilən Azərbaycan-Fransa iqtisadi komissiyasının iclasının yekunları üzrə mətbuat konfransında bildirib.
Nazir deyib: "Məlum olduğu kimi, fransalı tərəfdaşlar bizə birinci telekommunikasiya peykinin buraxılışı zamanı dəstək göstərdilər. Bu əməkdaşlıq indi də davam edir və biz ümid edirik ki, yaxın gələcəkdə konkret müqavilələrlə tədricən artacaq".
S.Şərifov qeyd edib ki, eyni zamanda, hələlik konkret tarixlər barədə danışmaq tezdir: "Zənn edirəm ki, bu sahənin çox spesifik olduğu nəzərə alınaraq, əvvəlcə ölkələr arasında müəyyən çərçivə sazişləri hazırlanacaq və təsdiqlənəcək. Yalnız bundan sonra kommersiya müqavilələri haqqında danışmaq olar".
