Azərbaycan, Bakı, 31 mart /Trend, müxbir H.Vəliyev/
2014-cü ilin birinci rübündə Azərbaycanda "ASAN imza" mobil elektron imza sertifikatlarının sayı 5,9 faiz artıb. Bu barədə Trend-ə bazar ertəsi Vergilər Nazirliyindən bildiriblər.
Nazirlikdən deyildiyi kimi, yanvar-mart aylarının yekunları üzrə "ASAN" Sertifikat Xidmətləri Mərkəzi (ASXM) tərəfindən 1322 sertifikat verilib.
Verilən "ASAN imza" mobil elektron imzaların ümumi sayı 23 759 ədəd təşkil edib. Onlardan 12 352-si hüquqi şəxslərin, 11 339-u fiziki şəxslərin, 68-i isə dövlət qulluqçularının payına düşüb.
Qeyd edək ki, Vergilər Nazirliyinin qərarı əsasında yaradılmış "ASAN" Sertifikat Xidmətləri Mərkəzi (ASXM) - autentifikasiya və "ASAN imza" mobil elektron imza sertifikatlarını təqdim edir və dövlət strukturları, özəl sektor və vətəndaşlar tərəfindən sertifikatların və elektron imzaların istifadəsini təmin edən digər xidmətləri həyata keçirir.
Mərkəz 2013-cü il aprelin 9-da Rabitə və İnformasiya Texnologiyaları Nazirliyi (indiki Rabitə və Yüksək Texnologiyalar Nazirliyi) tərəfindən akkreditə edilib və dövlət hakimiyyəti, yerli özünüidarəetmə orqanları, hüquqi və fiziki şəxslərə təkmil sertifikat vermək hüququna malikdir.