Azərbaycan, Bakı, 3 sentyabr /Trend, müxbir Hüseyn Vəliyev/
Rabitə və Yüksək Texnologiyalar Nazirliyi ölkədə genişzolaqlı internetin inkişafı layihəsinin reallaşdırılmasına başlananadək ilkin tədbirlərin həyata keçirilməsinə hazırlaşır. Trend-in məlumatına görə, bunu çərşənbə günü jurnalistlərə rabitə və yüksək texnologiyalar naziri Əli Abbasov deyib.
Onun sözlərinə görə, texniki səbəblərdən bu layihənin reallaşdırılması yubanır, lakin hazırda həll edilməmiş məsələ qalmayıb.
Nazir qeyd edib: "Biz yaxın vaxtlarda layihə üzrə nəzərdə tutulmuş bir sıra tədbirlərin reallaşdırılmasına başlamağı planlaşdırırıq, xüsusilə, özəl sektorun şirkətlərinin cəlb edilməsi üçün tenderlər keçiriləcək".
Layihənin ümumi dəyəri 450 milyon dollardan artıqdır. Layihə 2014-2016-cı illəri əhatə edəcək.
