Azərbaycan, Bakı, 8 sentyabr /Trend, müxbir Hüseyn Vəliyev/
Rabitə və Yüksək Texnologiyalar Nazirliyinin Elektron Təhlükəsizlik Mərkəzi informasiya təhlükəsizliyi sahəsində insidentlərin araşdırılması zamanı ESET şirkətinin texnologiyalarını tətbiq edəcək. Bunu bazar ertəsi Trend-ə ESET şirkətinin MDB ölkələrində tərəfdaşlarla iş şöbəsinin müdiri Aleksandr Jmur deyib.
Onun sözlərinə görə, Azərbaycanın informasiya təhlükəsizliyi bazarı MDB ölkələrində ən inkişaf etmiş bazarlardan biridir: "Korporativ seqmentdə və pərakəndə satış üzrə göstəricilər bunu deməyə əsas verir. Ötən il bazarın artımı təqribən 30 faiz təşkil edib və bu tendensiya cari ildə də davam edir".
A.Jmur qeyd edib ki, Azərbaycanda korporativ biznes seqmenti çox inkişaf edib və biznes həllərin satış həcmi artır. İstifadə üçün lisenziyaların satışına gəlincə, burada da gələcək artımın inkişafı və potensialı müşahidə olunur.
O, əlavə edib ki, Azərbaycanda ESET-in əsas və birbaşa rəqibi "Kasperski laboratoriyası"dır ki, bu da onun bazara erkən çıxışı ilə əlaqədardır: "ESET-in yaxın 2 il üçün Azərbaycanda inkişaf strategiyası bazarın pərakəndə və korporativ seqmentində tərəfdaşlarla sıx əməkdaşlığın artırılmasına əsaslanacaq. Şirkətin göstərilən sahədə zəruri təcrübəsi var və hazırda ESET-in həlli dövlət informasiya sistemlərinin müdafiəsinin təmin edilməsi üçün istifadə olunur".
Şirkətin yaxın 2 il üçün Azərbaycanda fəaliyyətinin inkişaf istiqamətlərinə əsasən, ESET bank sektoru və təhsil sahəsi ilə əməkdaşlığı genişləndirməyi planlaşdırır. Hazırda ESET-in bu sahələr üzrə layihələri reallaşdırma ərəfəsindədir.
A.Jmur bildirib ki, şirkət tərəfindən təhsil müəssisələri üçün güzəştli şərtlərlə antivirus müdafiənin baza paketi nəzərdə tutulub: "Orta təhsil müəssisələrində və ali məktəblərdə antivirus həllərdən istifadə üzrə ESET-in servislərinə əlavə endirimləri nəzərdə tutan güzəştli şərtlərimiz var. Şirkətin Özbəkistan Təhsil Nazirliyi ilə iş təcrübəsi var. Şirlət nazirliklə birgə ölkənin bir sıra universitetlərini ESET servislərinə qoşur. Biz analoji təcrübəni Azərbaycanda da tətbiq etməyə çalışacağıq".