Azərbaycan, Bakı, 9 sentyabr /Trend, müxbir Hüseyn Vəliyev/
Azərbaycanda Yüksək Texnologiyalar Parkının memarlıq-tikinti işlərinin aparılmasına podratçıların cəlb edilməsi üçün tenderin keçirilməsinə hazırlıq yekun mərhələdədir. Bunu çərşənbə axşamı Trend-ə Parkın baş direktorunun müavini Cabbar Musayev deyib.
Onun sözlərinə görə, Texnologiyalar Parkının layihələndirilməsi prosesi üzərində texniki nəzarət ABŞ-ın "Hill International" şirkəti tərəfindən həyata keçirilir: "Şirkət tikintinin idarə edilməsi üzrə dünyada ən yaxşılardan biridir".
C.Musayev qeyd edib ki, Parkın biznes planının hazırlanmasının birinci mərhələsi başa çatır. İşlər "Commit" konsaltinq şirkəti tərəfindən aparılır. İlin sonunadək Parkın təməlinin qoyulması nəzərdə tutulur.
O vurğulayıb ki, yol xəritəsi hazırlandıqdan sonra tikinti işləri planlı qaydada, tədricən həyata keçiriləcək: "İlkin mərhələdə bir sıra obyektlərin fəaliyyətini həyata keçirməyə imkan verən infrastrukturun yaradılması nəzərdə tutulur. Tikinti işlərinin maliyyələşdirilməsi dövlət vəsaitləri hesabına nəzərdə tutulub. Bununla belə, əsas meyarlar orta həcmli xərc çəkməklə müasir qurğuların tikintisidir".
