Azərbaycan, Bakı, 11 sentyabr /Trend, müxbir Hüseyn Vəliyev/
Azərbaycanın Elektron Rəqəmli İmzaların Sertifikatlaşdırılması Milli Mərkəzi (İEM) "Microsoft" korporasiyasının sertifikatlara etimad siyahısına (Trust List) daxil edilib. Bu barədə çərşənbə günü Trend-ə Rabitə və Yüksək Texnologiyalar Nazirliyinin Məlumat Hesablama Mərkəzinin direktoru Nail Mərdanov bildirib.
Onun sözlərinə görə, elektron imzaların "Trust List Microsoft"-a daxil edilməsi üçün Microsoft-un əsas tələbi mərkəzin İnformasiya Təhlükəsizliyinin İdarə Edilməsi Sisteminin ISO/IEC 27001:2005 sertifikatının tələblərinə uyğunluğu idi.
Sertifikatın alınması milli mərkəzin sertifikatlaşdırma xidmətləri fəaliyyətinin beynəlxalq standartlara uyğun olaraq təmin edildiyini təsdiqləyir.
Mərdanov bildirib: "Bu, bizə Avropa ölkələri və başqa dövlətlərlə elektron imzaların qarşılıqlı tanınması ilə bağlı danışıqlara başlamağa imkan verəcək".
ISO 27001 təşkilatın öz informasiya resurslarını müdafiə etmək qabiliyyətini nümayiş etdirmək üçün informasiya təhlükəsizliyinin idarə edilməsi sisteminə tələbləri müəyyən edir.