Azərbaycan, Bakı, 10 oktyabr /Trend, müxbir Hüseyn Vəliyev/
Azərbaycan Rabitə və Yüksək Texnologiyalar Nazirliyi (RYTN) ilə Milli Televiziya və Radio Şurası (MTRŞ) televiziya və internet kontentin tənzimlənməsi üzrə hüquqi normalar hazırlamaq niyyətindədirlər.
Trend-in məlumatına görə, bunu cümə günü Bakıda Azərbaycanın rabitə və yüksək texnologiyalar naziri Əli Abbasov İran İslam Respublikasının Radio-Televiziya Təşkilatının sədri, İran Ali Rəhbərinin teleradio yayımı üzrə nümayəndəsi İzzətullah Zərqaminin başçılıq etdiyi nümayəndə heyəti ilə görüşdə deyib.
Onun sözlərinə əsasən, hazırda televiziya kontentinin (o cümlədən internet televiziyası) tənzimlənməsi məsələsinə RYTN və MTRŞ tərəfindən baxılır.
Ə.Abbasov bildirib ki, söhbət terror və zorakılıq təbliğ edən kontentin, eləcə də mənəvi normalara uyğun olmayan verilişlərin yayımlanmasının qarşısını almaqdan gedir.
Nazir qeyd edib ki, çox vaxt ictimaiyyət və KİV internetin tənzimlənməsinə istehlakçıların hüquqlarının məhdudlaşdırılması və pozulması prizmasından baxırlar ki, bunu da düzgün yanaşma adlandırmaq olmaz: "Hazırda Azərbaycan digər ölkələr kimi internetin (o cümlədən şəbəkə kontentinin) tənzimlənməsi problemi ilə üzləşir. Bir çox ölkələr müvafiq məsələnin həlli üçün balanslaşdırılmış yanaşma axtarışındadırlar".
O, əlavə edib ki, hazırda peyk televiziyasının geniş yayılması və internetin dinamik inkişafı fonunda həyata keçirilməsi mümkün ola bilən düşünülmüş çərçivə qanunun hazırlanması zərurəti yaranır.