Azərbaycan, Bakı, 15 fevral /Trend, müxbir Hüseyn Vəliyev/
Azərbaycanın mobil rabitə operatorlarının şəbəkələrində "Mobile Finance" servisinin işə salınması gecikir. Bu barədə Trend-ə telekommunikasiya bazarındakı mənbə deyib.
Agentliyin həmsöhbətinin sözlərinə görə, mobil rabitə operatorları bu servisin işə salınmasına texniki baxımdan hazırdırlar. Lakin bunun üçün Azərbaycan Mərkəzi Bankı və digər tənzimləyici orqanlar səviyyəsində qanunvericiliyə uyğun şəkildə nizamlama ilə bağlı məsələləri həll etmək lazımdır.
Bundan əvvəl Azərbaycan operatorlarının şəbəkələrində mobil maliyyə xidmətinin işə salınması 2014-cü ilin sonuna planlaşdırılırdı.
"Mobile Finance" xidməti abonentlərə öz bank hesablarına mobil qurğular vasitəsilə çıxış, pul köçürmələri həyata keçirmək və müxtəlif xidmətlər (internet, kommunal xidmətlər, TV, mobil və stasionar telefon rabitəsi) üzrə ödəniş etmək imkanı verir.