First International Merchant Bank-ın (FIMBank) azərbaycanlı şahidlərin ifadələrinin dinlənilməsinə dair Rotterdam məhkəməsinə təqdim etdiyi vəsatət - bankın məğlubiyyət ərəfəsində atdığı son ümidsiz addımdır. Trend xəbər verir ki, Azərbaycanın rabitə və informasiya texnologiyaları naziri Əli Abbasov bu fikirdədir.
Nazirin bu gün jurnalistlərə verdiyi məlumata görə, məhkəmə təhqiqatı artıq sona çatır. "Biz inanırıq ki, məhkəmə Azərbaycan hökümətinin xeyrinə qərar çıxaracaq", - deyə Ə.Abbasov qeyd edib.
Məhkəmə şahidlərin ifadələrini dekabr ayının ikinci dekadasında dinləyəcək.
Əvvəl bank şahidlərin Rotterdamda dindirilməsinə təkid edərək, Rabitə Nazirliyinin 8 şahidin Azərbaycanda dindirilməsinə dair təklifilə razılaşmayıb. Məhkəmə bankın vəsatətinin təmin edilməsi haqqında qərar qəbul edib.
Oktyabr ayında Paris məhkəməsi Azərbaycan tərəfinin müraciətini gözdən keçirəcək. Paris məhkəməsinin bankın iddiası üzrə qərarı ilə Rabitə Nazirliyinin vəsaitlərinə - Azərbaycan tərəfinin Fransanın Eutelsat S.A. şirkətinə qoyduğu 500 min səhmə və onların 1 mln. ABŞ dollarından artıq dividendlərinə həbs qoyub. Məhkəmə bu yaxınlarda bankın vəsatətini təmin edib, onun qərarı ilə bu vəsaitlər xüsusi hesabda girov altında götürülüb. Məhkəmənin son qərarı zamanı Paris məhkəməsinin 6,5 mln. avro həcmində dəyərləndirdiyi vəsaitlər avtomatik olaraq məhkəmənin xeyrinə qərar çıxardığı tərəfin balansına keçəcək.
2004-cü ilin iyul ayında First İnternational Merchant Bank (FİM bank) guya Rabitə Nazirliyi və Poçtbank AKB-nin zəmanəti altında Rabitə Nazirliyinin mövcud olmayan Aztell müəssisəsinə 3035000 ABŞ dolları və Baktell müəssisəsinə 1560000 ABŞ dolları həcmində verdiyi kreditin ödənilməməsi faktı üzrə iddia ilə Azərbaycan hökümətinə qarşı çıxıb.
