Azərpoçt DB ilə birgə layihə çərçivəsində kompüter texnikasını yeniləyir

Azərpoçt Dövlət müəssisəsi (DM) Dünya Bankı ilə birgə həyata keçirilən "Maliyyə xidmətlərinin inkişafı" layihəsi çərçivəsində 450 kompüter alıb. Bu barədə Trend ə cümə günü DM-dən məlumat verilib.

Kompüterlər tenderin qalibi olan Azerbaijan Electronics (Azel) şirkətindən alınıb. Onlar artıq müəssisəyə təqdim olunub və bu gündən etibarən Bakı, Sumqayıt və Abşeron yarımadasının poçt şöbələri arasında paylaşdırılacaqlar. "Layihə reallaşdırıldıqca, analoji tədbirlər gələcəkdə bölgələrdə də həyata keçiriləcək", - deyə DM-dən bildirilib.

Bundan başqa, layihə çərçivəsində həmçinin yeni sistemlə iş üzrə müəssisə əməkdaşlarının ixtisasının artırılması məqsədilə onlar üçün treninqlərin keçirilməsi nəzərdə tutulub.

Əvvəl müəssisə baş ofisin avtomatlaşdırılmasını həyata keçirib və indi kompüter texnikasını yeniləyir, belə ki, layihəyə əsasən, müəssisə maliyyə və bank xidmətləri göstərməyə başlayacaq. Bunun üçün Azərpoçt Azərbaycan Milli Bankından müvafiq status almalıdır və yalnız bundan sonra o, milli ödəniş sisteminə daxil ediləcək.

Müəssisədə hesab edirlər ki, bu xidmətləri artıq 2007-ci ildə paytaxtda, daha sonra ölkə bölgələrində göstərmək mümkün olacaq.