Azərbaycanın Rabitə və İnformasiya Texnologiyaları Nazirliyində Merilend universitetinin professoru Roald Saqdeyevlə görüş keçirilib. Trend Azərbaycan Milli Elmlər Akademiyasına (AMEA) istinadən xəbər verir ki, görüşdə AMEA prezidenti Mahmud Kərimov, Milli Aviasiya Akademiyasının rektoru Arif Paşayev, xarici işlər nazirinin müavini Hafiz Paşayev, AMEA Kibernetika institutunun başçısı Telman Əliyev, Attestasiya üzrə Ali komissiyanın başçısı Arif Mehdiyev, Aztelekom İB-nin baş direktoru, Bakı Telefon Rabitəsi İB-nin baş direktoru, Teleradio İB-nin direktoru İlham Əhədov, beynəlxalq münasibətlər və hesablamalar mərkəzinin direktoru Cəlil Cəfərov və Rabitə Nazirliyinin başqa əməkdaşları iştirak edib.
Tədbirdə çıxış edən rabitə naziri Əli Abbasov qeyd edib ki, Saqdeyev "İpək yolu peyki" (Silk Sat) layihəsinin təşəbbüskarıdır.
"Bu gün Azərbaycan öz milli rabitə peykinin təşkilinə dair beynəlxalq təşkilatlarla danışıqlar aparır və bu baxımdan Silk Sat layihəsi Azərbaycan üçün çox vacibdir", - deyə nazir vurğulayıb.
Alim Silk Sat layihəsindən danışıb və qeyd edib ki, onun reallaşdırılmasında Azərbaycan və Qazaxıstan böyük rol oynayır.
Saqdeyev Roald Zinnuroviç "Kosmos", "Proqnoz", "İnterkosmos", "Meteor", "Astron", "Mars", "Venera" seriyalı kosmik aparatlarda, "Soyuz", "Salyut" orbital komplekslərdə bir sıra unikal tədqiqat proqramlarına rəhbərlik edib. O, sülh uğrunda beynəlxalq alimlər hərəkatının liderlərindən biridir. Sülhün müdafiəsi, nüvə təhlükəsinə qarşı Sovet alimləri komitəsinə başçılıq edib. Toroidal plazmada köçürmə proseslərinin qeyri-klassik nəzəriyyəsini yaratdığına görə o, 1984-cü ildə (müştərək müəlliflikdə) Lenin mükafatına layiq görülüb. İki Lenin ordeni, Oktyabr İnqilabı və Qırmızı Əmək Bayrağı ordenləri ilə təltif olunub. SSRİ-nin xalq deputatı seçilib.