Azərbaycan, Bakı/müx. Trend S.Babayeva/Azərbaycan Rabitə və İnformasiya Texnologiyaları Nazirliyinin poçt sektorunun rəhbəri Novruz Məmmədovun verdiyi məlumata görə, "Azərpoçt" Dövlət Müəssisəsinin (DM) əməkdaşları "Maliyyə xidmətlərinin inkişafı" layihəsi çərçivəsində avqustun 3-də test imtahanlarından keçəcəklər.
Əməkdaşlar maliyyə-bank xidmətlərinin göstərilməsi məqsədilə "Azərpoçt" DM aparatının restrukturizasiyası çərçivəsində seçim prosesindən keçəcəklər.
Aparat əməkdaşlarının seçimi üçün 11 nəfərdən ibarət xüsusi komissiya yaradılıb. Komissiyanın vəzifələrinə DM-nin yeni strukturu üçün işçilərin seçimi prosesində şəffaflığın təmin edilməsi daxildir.
İşçilərin seçimi üçün xüsusi müvəqqəti qaydalar hazırlanıb və bu qaydalarda bütün prosedurlar əksini tapıb, Bu prosedurlara uyğun olaraq seçim, bal sistemi ilə qiymətləndirmə yolu ilə üç mərhələdə həyata keçiriləcək.
Məmmədovun sözlərinə görə, DM-nin bütün əməkdaşları topladıqları baldan asılı olmayaraq ikinci mərhələyə buraxılacaqlar. Seçim prosesindən keçə bilməyənlər isə DM-nin filiallarında və poçt bölmələrində işlə təmin olunacaqlar.
"Azərpoçt" aparatının yeni əməkdaşlarının seçim prosesi avqustun 12-də başa çatacaq. Hazırda DM əməkdaşlarının sayı 113 nəfər təşkil edir, yeni struktura əsasən, əməkdaşların sayı 105 nəfər olacaq.
