Azərbaycan, Bakı, 22 fevral /Trend, müxbir N.İsmayılova /
Azərbaycanın Ədliyyə Nazirliyi ədliyyə sistemi haqqında məlumatların toplanması üzrə kampaniyanın aparılması məqsədilə ictimai-informasiya strategiyasının hazırlanması və reallaşdırılması üzrə tender elan edib. Bu barədə çərşənbə günü nazirliyin yaydığı məlumatda deyilir.
Məsləhət xidmətlərinin cəlb olunması üzrə tender Azərbaycan hökuməti və Beynəlxalq İnkişaf Assoasiyasının (BİA) "Məhkəmə sistemlərinin modernləşdirilməsi" birgə layihəsi çərçivəsində elan edilib.
Məsləhətçilər işləri mütləq iki mərhələdə həyata keçirməlidirlər. Birinci mərhələ çərçivəsində strategiyanı hazırlamaq və onun reallaşdırılmasına başlamaq lazımdır, strategiya əsasında materiallar hazırlamaq və onları KİV-də dərc etdirmək, elektron KİV üçün materiallar hazırlamaq lazımdır. İkinci mərhələ çərçivəsində çap və elektron materialların keyfiyyətinin yoxlanılması, media cəmiyyətlərin nümayəndələri ilə təmaslar qurmaq üzrə işlərin aparılması nəzərdə tutulur.
Müqavilənin yerinə yetirilməsi müddəti 12 ay təşkil edir. Məsləhətçi şirkət bu sahədə ən azı beş illik təcrübəyə malik olmalıdır.
Tenderdə iştirak etmək üçün sənədlər nazirliyə 2012-ci il martın 9-u saat 18:00-dan gec təqdim olunmamalıdır. Əlaqə telefonu: 5108559\60, faks: 5107672, e-mail: [email protected].