İran Çin və Venesueladan S-300 raket əleyhinə müdafiə sistemlərini almağı planlaşdırmır. Bunu İranın müdafiə naziri Əhməd Vəhidi bir sıra KİV-lərdə İranın bəzi ölkələrdən S-300 alması barədə yayılan məlumatlara münasibət bildirərkən deyib. Bu barədə FARS xəbər agentliyi məlumat verir.
Bəzi KİV-lərdə məlumatlar dərc olunub ki, Venesuela Prezidenti Huqo Çavez S-300 RƏM sistemini Rusiyadan alaraq İrana təhvil verə bilər. "Biz Rusiyadan S-300 sistemini və digər silahları almaq barədə razılıq əldə etmişik", - Çavez oktyabrın 18-də Kiyevdə bildirib.
Vəhidi bu barədə yayılan məlumatları şayiə adlandırıb və deyib ki, İran Silahlı Qüvvələri hərbi texnologiyalar sahəsində nəzərəçarpacaq dərəcədə inkişaf edib.
Rusiya və İran 1 milyard dollar dəyərində S-300 raket əleyhinə müdafiə sistemi barədə razılaşmanı 2005-ci ilin dekabr ayında imzalayıblar. Bu razılaşmadan və İranın nüvə proqramından narahat olan ABŞ və İsrail Moskvadan Tehrana raket sisteminin satılmasından imtina etməsini istəyib. Rusiya beynəlxalq sanksiyalarla bağlı S-300 raket əleyhinə müdafiə sisteminin İrana satışı barədə imzalanmış müqaviləni ləğv edib və satışdan imtina edib.